Ս. Ծննդեան Եւ Նոր Տարուան աւանդական հաւաք` «Նարեկի Տիրամայր» կեդրոնին մէջ։
Ինչպէս ամէն տարի, այս տարի եւս Պուրճ Համուտի «Նարեկի Տիրամայր» ընկերային-բժշկական
կեդրոնին մէջ տեղի ունեցաւ Նոր տարուան եւ Ս. ծննդեան տօնի աւանդութիւն դարձած ընկերային
հանդիպումը` կեդրոն յաճախող պուրճհամուտաբնակ տարեցներուն հետ: Ընկերային հանդիպումը
սկսաւ Զըմմառու վանքի մեծաւոր գերապայծառ Գաբրիէլ Թ. Ծ. վրդ. Մուրատեանի Տէրունական աղօթքով:
Ապա խօսք առաւ կեդրոնի տնօրէն տոքթ. Կոստան Եափուճեան, որ նշեց, թէ այս տարի գերապայծառ
տէրը ինք անձամբ հաճեցաւ ներկայ գտնուիլ եւ հովանաւորել այս հաւաքոյթը: Տոքթ. Եափուճեան
շնորհակալութեան խօսք ուղղեց նուիրատուներուն եւ հովանաւոր միութիւններուն, որոնց օժանդակութեան
շնորհիւ կեդրոնը ոտքի կը կանգնի եւ կը շարունակէ իր ընկերային եւ առողջապահական ծառայութիւնը:
Իր խօսքի աւարտին տոքթ. Եափուճեան հարց տուաւ, որ արդեօք ժամանակը չէ՞ հասած, որ Մալթայի
ասպետներու միութեան օրինակով այս կեդրոնին օգտակար հանդիսացող բարերարները համախմբուին
եւ կազմեն Նարեկի Տիրամօր ասպետներու միութիւնը` ընկերային ծառայութիւնը աւելի նպատակասլաց
դարձնելու համար: Այնուհետեւ խօսք առաւ Գաբրիէլ Թ. Ծ. վրդ. Մուրատեան, որ նշեց, թէ
իրեն համար մեծ օրհնութիւն է գտնուիլ կեդրոնի տարեց այցելուներուն հետ: Ան Ներսէս Պետրոս
ԺԹ. պատրիարքին եւ Զըմմառու Տիրամօր օրհնութիւնը փոխանցեց ներկայ տարեցներուն եւ պատասխանելով
տոքթ. Եափուճեանի հարցադրումին ըսաւ, որ դիւրին է միութիւն մը ստեղծել թուղթի վրայ, սակայն
կարեւորը այն է, թէ ինչպէս այդ միութեան աշխատանքը կազմակերպ ձեւով ընթանայ: Ան խոստացաւ
այս հարցը ներկայացնել ամենապատիւ հոգեւոր տիրոջ: Գերապայծառը նաեւ խոստացաւ Նոր տարիէն
ետք Զմմառու վանքին կողմէ մասնագէտներ ղրկել կեդրոն` նոր ջեռուցիչ էր-քոնտիշըններով օժտելու
համար կեդրոնը: Ընկերային հաւաքի աւարտին ժամանեց Կաղանդ պապուկը եւ ներկայ գտնուող
տարեցներուն բաժնեց Ս. Ծննդեան նուէրները: